Árshlutareikningur fyrri hluta árs samþykktur af stjórn
Rekstur Orkuveitu Reykjavíkur (Orkuveitunnar) skilaði 4,9 milljarða króna hagnaði fyrstu sex mánuði ársins, sem er óbreytt afkoma frá fyrra ári. Rekstrartekjur samstæðunnar jukust um 13% milli ára og námu 38,8 milljörðum króna samanborið við 34,4 milljarða króna á sama tímabili árið áður. Rekstrarhagnaður fyrir afskriftir (EBITDA) nam 23,7 milljörðum króna og jókst um 17% frá fyrra ári. Hagnaður tímabilsins nam 4,9 milljörðum króna.
Veltufé frá rekstri nam 18,2 milljörðum króna en var 15,9 milljarða króna á fyrri helmingi ársins 2025 og handbært fé frá rekstri nam 18,8 milljörðum króna.
Vaxandi fjárfestingar
Á tímabilinu fjárfesti samstæðan fyrir 15,0 milljarða króna sem er aukning úr 12,9 milljörðum króna fyrstu sex mánuði ársins 2025. Fjárfestingar beinast einkum að uppbyggingu og endurnýjun veitukerfa, öflun orkuforða og að orkuvinnslu.
„Sex mánaða uppgjörið sýnir styrk og stöðugleika í rekstri Orkuveitunnar. Rekstrartekjur hafa aukist um 13% milli ára og EBITDA um 17%, á sama tíma og veltufé frá rekstri nam rúmum 18 milljörðum króna. Sú þróun hefur gert okkur kleift að ráðast í umfangsmiklar fjárfestingar í innviðum og styrkja enn frekar orku- og veituþjónustu á okkar starfssvæði. Þrátt fyrir hærri fjármagnskostnað og tímabundin áhrif af rekstrartruflunum hjá stórum viðskiptavini er fjárhagsstaða samstæðunnar sterk, lausafjárstaðan góð og félagið vel í stakk búið til að mæta vaxandi þörfum samfélagsins á komandi árum,“ segir Sævar Freyr Þráinsson forstjóri.
„Þessa traustu afkomu nú má ekki síst rekja til þess aðhalds sem við gripum til strax síðasta haust þegar rekstur Norðuráls varð fyrir skakkaföllum. Þar hefur gengið betur að greiða úr en óttast var og þess nýtur Orkuveitan nú,“ bætir hann við. Ágreiningur Norðuráls og Orkuveitunnar vegna málsins er kominn fyrir gerðardóm.
Heildareignir samstæðunnar námu 552 milljörðum króna í lok júní samanborið við 538 milljarða króna í árslok 2025. Eigið fé nam 284 milljörðum króna og eiginfjárhlutfallið var 51,5%.