Orkuveitan undirbýr nú borun á ofurheitri borholu á Nesjavöllum sem gengur undir nafninu IDDP-3 og er fyrsta skrefið í því að reyna að nýta jarðhita sem er yfir 400°C. Í fjórða og síðasta skrefi verkefnisins verður IDDP-3 holan tengd við virkjun Orku náttúrunnar með það að markmiði að vinna orku úr ofurheitum jarðlögum í fyrsta skipti á heimsvísu.

Þetta kemur fram í ítarlegri umfjöllun Morgunblaðsins í dag þar sem rætt var við Sævar Frey Þráinsson forstjóra Orkuveitunnar og Heru Grímsdóttur, framkvæmdastýru rannsókna og nýsköpunar.

Djúpnýtingarverkefni Orkuveitunnar, sem er móðurfélag ON, hefur vakið athygli fyrir metnaðarfull markmið um að sækja orku dýpra niður í jarðhitakerfi landsins en áður hefur verið gert. Takist vel til  gæti það opnað nýja möguleika í orkuvinnslu hér á landi og markað tímamót í nýtingu jarðhita.

„Við ætlum okkur að vera fyrst í heiminum til að sýna fram á raforkuvinnslu úr slíkri holu,“ segir Sævar Freyr í viðtalinu.

Fyrir ON felast í verkefninu mikilvæg framtíðartækifæri. Aukin nýting á dýpri og heitari hlutum jarðhitakerfa gæti styrkt möguleika fyrirtækisins til að framleiða endurnýjanlega orku með enn skilvirkari hætti, bætt orkunýtni og stutt við áframhaldandi orkuöryggi og verðmætasköpun úr íslenskum auðlindum. „Þetta snýst um að nýta auðlindir betur, ekki bara að fá meira,“ sagði Sævar Freyr jafnframt.

Hluta af viðtalinu við þau Sævar Frey og Heru má lesa hér og svo nánar í Morgunblaðinu á bls. 18-20.

Nýjustu rekstrarniðurstöður frá lofthreinsistöðinni Steingerði við Hellisheiðarvirkjun Orku náttúrunnar sýna framúrskarandi árangur.

Á tímabilinu 1. júlí 2025 til 30. júní 2026 var 99,6% þess koldíoxíðs (CO₂) og allt brennisteinsvetni (H₂S) sem barst inn í föngunarkerfi lofthreinsistöðvarinnar leyst upp í vatni og sent til varanlegar bindingar í berggrunninum. Slík föngun er fyrsta stig bindingar á koldíoxíði og sýna niðurstöðurnar mikla skilvirkni Steingerðar, sem er samstarfsverkefni Carbfix og Orku náttúrunnar við Hellisheiðarvirkjun .

Náttúrulegu ferli hraðað

Carbfix aðferðin er sú sama og náttúruleg kolefnishringrás byggir á sem tekur árþúsundir en tækni Carbfix bindur koldíoxíðið strax í vatninu með Steingerði og umbreytir því svo í nýjar steindir innan tveggja ára með því að dæla kolsýrða vatninu í berglögin á svæðinu. Með því dregur starfsemin úr loftslagsáhrifum jarðvarmavinnslunnar og stuðlar jafnframt að öruggri og hagkvæmri meðhöndlun brennisteinsvetnis. Á tímabilinu var rúmlega 19 þúsund tonnum af CO₂ dælt niður um eldri jarðhitaholur sem nýtast nú til niðurdælingar.

Mikilvæg staðfesting á tækninni 

Hellisheiðarvirkjun ON hefur verið í fararbroddi á heimsvísu við að draga úr losun frá jarðvarmavinnslu og gegnir Steingerður þar lykilhlutverki. Rekstrarniðurstöðurnar sýna mikla nýtni föngunartækninnar og staðfesta virkni hennar í samfelldum rekstri.

Frá því Carbfix-aðferðin var tekin í notkun á Hellisheiði hafa meira en 120 þúsund tonn af CO₂ og yfir 50 þúsund tonn af H₂S verið bundin í bergi. 

Hönnun og bygging Steingerðar er lykilþáttur í svokölluðu Silfurberg verkefni sem hlaut tæplega 3,9 milljóna evra styrk úr Nýsköpunarsjóði Evrópusambandsins. Stuðningurinn hefur verið mikilvægur við þróun og stækkun tækninnar og stuðlað að aukinni þekkingu á því hvernig nýta má íslenskt hugvit og verkþekkingu til að draga úr losun gróðurhúsalofttegunda.